Um Iðavelli

​​

Iðavellir eru æfinga- og keppnissvæði Skotíþróttafélags Hafnarfjarðar, staðsett í Kapelluhrauni rétt sunnan við Álverið í Straumsvík og ofan við kvartmílubrautina.

​

Félaginu var úthlutað þessu svæði haustið 1997 undir starfsemi sína sem var um svipað leiti og aðstaða félagsins í Óbrynnishólum var tekin niður.

​

Svæðið sem er í jaðri hraunnáms var á þeim tíma eingöngu hraunmulningur án nokkurs gróðurs. Þá um haustið var hafist handa við að ryðja upp hljóð og -öryggismön sem afmarkar svæðið í allar áttir. Um svipað leiti fór fram teikni og hönnunarvinna á svæðinu en það verk vann þá nýr félagsmaður SÍH, arkitektinn Marteinn Huntingdon Williams. Uppbygging á svæðinu hófst síðan um mitt sumar 1998 með miklum efnisflutningum, byggingu sökkla undir turna og hús ásamt niðurlagningu á steypu í palla og gangbrautir á milli þeirra.

​

Haustið 1998 var völlurinn full formaður með brautum, pöllum, vélarhúsum, geymslugámum og félagsaðstöðu og stóð hann þannig um veturinn án þess að vera tekinn í notkun.

​

Snemma vorið eftir var hafist handa við að klára það sem upp á vantaði og var ákveðið að ekki yrði hleypt af einu einasta skoti fyrr en allt væri tilbúið og völlurinn yrði vígður formlega.

​

Að öðrum ólöstuðum voru þeir Hreimur Garðarsson og Stefán Geir Stefánsson helstu hvata og framkvæmdastjórar verksins frá upphafi til enda. En eftir því sem verkinu miðaði var hægt að dreifa verkum á fleiri hendur og þegar upp var staðið höfðu allmargir lagt hönd á plóginn.

​

Af frumkvæði þeirra félaga urði mikil umskipti á svæðinu sem á skömmum tíma breyttist úr því að vera ljótar hraunnámur í það að vera uppgróinn sælureitur með grasflötum, göngustígum, trjágróðri og snyrtilega máluðum byggingum.

​

Völlurinn var síðan opnaður formlega með viðhöfn laugardaginn 5. júní 1999 með því að bæjarstjórinn í Hafnarfirði klippti á borða í íslensku fánalitunum og hleypti þannig fyrstu sex valinkunnum félögum SÍH inná völlinn þar sem þeir sýndu gestum getu sína í skotfimi.

​

Mikill gleðskapur með tilheyrandi veitingum í mat og drykk var að þeirri sýningu lokinni og áttu félagsmenn og gestir góðar stundir fram eftir kvöldi á Iðavöllum, nýjum, fallegum og notalegum skotvelli félagsins.